50 мыңнан астам бала «Тергеуді Адал бала жүргізеді» рөлдік тергеу ойынына қатысты

Павлодар облысының барлық мектеп жанындағы және қала сыртындағы лагерьлерінде 50 мыңнан астам оқушыны қамтыған ауқымды «Тергеуді Адал бала жүргізеді» рөлдік тергеу ойыны өтті.

Іс-шаралар «Заң мен тәртіп» идеологемасын және «Адал азамат» бірыңғай тәрбие тұжырымдамасын іске асыру аясында ұйымдастырылды. Жобаның басты мақсаты – өскелең ұрпақтың құқықтық санасын, адалдық, әділдік қағидаттарын, құқықтық сауаттылығын және сыбайлас жемқорлыққа қарсы мәдениетін қалыптастыру.

Бірнеше сағатқа қатысушылар өздерін нағыз тергеуші ретінде сезінді: айғақтарды жинады, құпия хабарламаларды шешті, заңнама негіздері бойынша «Құқықтық лабиринттен» өтті, куәгерлерден жауап алып, фактілерді саралады. Ойын барысында оқушылар сыбайлас жемқорлыққа қарсы іс-қимыл, азаматтардың құқықтарын қорғау және қоғамдағы жауапты мінез-құлыққа қатысты жағдайларды талқылап, заңды әрекеттер мен құқық бұзушылықтардың аражігін ажыратуды және негізделген шешім қабылдауды үйренді.

Ойынның жарқын мысалдарының бірі Павлодар қаласының білім беру ұйымдарында өтті. Мұнда қатысушылар тақырыптық кейстерді зерттеп, топтарда жұмыс істеді, дәлелдерді салыстырып, оқиғаға қатысты өз нұсқаларын ұсынды. Балалар өз білімдерін ғана емес, сондай-ақ командада жұмыс істеу, мұқият болу, бастамашылдық таныту және логикалық ойлау қабілеттерін де көрсетті.

Ұйымдастырушылардың айтуынша, рөлдік ойын форматы балалармен маңызды құқықтық мәселелер туралы түсінікті әрі қызықты тілде сөйлесуге мүмкіндік береді.

«Бала жай ғана тыңдаушы емес, тергеу процесінің тікелей қатысушысына айналған кезде, ол заңның, әділдіктің және жеке жауапкершіліктің құндылығын тереңірек түсінеді. Осындай тәжірибелік форматтар арқылы құқықтық мәдениет пен белсенді азаматтық ұстаным қалыптасады», – деп атап өтті ұйымдастырушылар.

Тергеу қорытындысы бойынша барлық қатысушылар тапсырмаларды сәтті орындап, жас детективтер атағына ие болды, ал ең белсенді командалар естелік дипломдармен және символикалық сыйлықтармен марапатталды.