Цифрлық білім беру тренді: “TopIQ – MobilBox” автономды оқу станциясының тиімділігі мен іс-тәжірибесі

Қазіргі таңда білім беру жүйесін цифрландыру және мектеп кітапханаларын заманауи форматта қайта түлету — уақыт талабы. Осы орайда, отандық «Алматыкітап» баспасының демеушілігімен шағын жинақты мектептерге сыйға тартылған «TopIQ – MobilBox» автономды оқу станциялары білім беру кеңістігінде өзіндік серпіліс тудырып отыр.

Бұл автономды құрылғы мектеп қабырғасында интернеттің сапасына қарамастан, электронды оқулықтар мен мультимедиалық ресурстарды кедергісіз пайдалануға жол ашты. Мобильді станцияның ең басты артықшылығы — оның икемділігі мен қолжетімділігінде. Құрылғыны мектептің кез келген нүктесінде еркін қолдануға болады. Әбіш Кекілбайұлы, Есбол, Аққала және М. Мөңкеұлы орта мектептерінің педагогтері мен кітапханашылары бұл құрылғыны сабақта ғана емес, үзілістерде де тиімді пайдалануда.

Қоңыраудағы «көңілді үзілістер» балалардың сандық тақта арқылы логикалық тапсырмаларды қызыға орындауына мүмкіндік береді. Станция ішкі автономды желімен жұмыс істейтіндіктен, оқушылар сапалы білім беру контентіне жылдам қосыла алады. Республикалық «Балалар кітапханасы» жобасын жүзеге асыруда және оқушылардың кітап оқуға деген ынтасын арттыруда «TopIQ – MobilBox» таптырмас құралға айналды.

Аққала орта мектебінде өткен «Кітап оқу күнінде» бастауыш сынып оқушылары мобильді станция арқылы аудио-ертегілер тыңдап, электронды кітаптар оқыды. Платформадағы бекіту тапсырмалары балалардың мәтінді түсіну қабілетін шыңдап, шараға оқушылардың 100% белсенді қатысуын қамтамасыз етті. М. Мөңкеұлы атындағы мектепте де 4-сынып оқушылары «Алдар Көсе» ертегісін интерактивті форматта тыңдап, логикалық сұрақтарға жауап берді. Бұл әдіс балалардың кітапқа деген құштарлығын оятты.

«TopIQ – MobilBox» технологиясы мектептегі тәрбие жұмысын да жаңа деңгейге көтеруде. Мәселен, Аққала орта мектебінде «Адал азамат» бағдарламасы шеңберінде өткен «Жыр алыбы — Жамбыл» сынып сағатында Жамбыл Жабаевтың өмірі туралы сапалы бейнебаян көрсетілді. Мұндай визуалды контент оқушылардың ұлтжандылық сезімін оятуға және адамгершілік құндылықтарды сіңіруге үлкен әдістемелік септігін тигізеді.

«Алматыкітап» баспасының заманауи тартуы — мектеп кітапханаларының ақпараттық-ресурстық орталыққа айналуының айқын дәлелі. Іс-тәжірибе көрсеткендей, бұл құрылғы мұғалімдер мен кітапханашылардың жұмысын жеңілдетіп, оқушылардың функционалдық сауаттылығы мен цифрлық мәдениетін арттыруда таптырмас кешен болып табылады.

Гулнур Темиргалиевна Даутова,
білім бөлімінің әдіскері,
Атырау облысы, Индер ауданы