«Айбын» XII Халықаралық әскери-патриоттық жастар жиыны

2026 жылғы 23–29 маусым аралығында Ақмола облысындағы «Амандық» оқу-жаттығу полигонында «Айбын» XII Халықаралық әскери-патриоттық жастар жиыны өтті. Жыл сайын ұйымдастырылатын бұл жиын әскери-патриоттық клубтардың, білім беру ұйымдарының және жастар бірлестіктерінің үздік өкілдерін бір алаңға жинап, қатысушыларға дене дайындығының, әскери-қолданбалы және тактикалық машықтарының жоғары деңгейін көрсетуге, сондай-ақ патриоттық рухты, азаматтық жауапкершілікті және командалық бірлікті нығайтуға мүмкіндік береді.

Апта бойы қатысушылар әскери-қолданбалы спорт түрлері бойынша жарыстарға, саптық және атыс даярлығына, әскери-тактикалық сынақтарға, зияткерлік байқауларға және командалық жарыстарға қатысты. Жиынның барлық кезеңдері қатысушылардан жоғары төзімділікті, тәртіпті, ерік-жігерді және ұжымда бірлесе жұмыс істей білуді талап етті.

Халықаралық жиында Павлодар облысының намысын облыс құрамасы қорғап, жоғары дайындық деңгейі мен спорттық шеберлігін көрсетті.

Май ауданы Е. Мұқашев атындағы жалпы орта білім беру мектебінің оқушысы Мигранов Расул жоғары кермеге тартылу бойынша жеке біріншілікте барлық қатысушылар арасынан үздік нәтиже көрсетіп, «Айбын» XII Халықаралық әскери-патриоттық жастар жиынының абсолютті чемпионы атанды. Ол тамаша дене дайындығының, қайсар мінезі мен жеңіске деген жігерінің арқасында аталған сайыста ең үздік нәтиже көрсетіп, өз шеберлігін дәлелдеді.

Сондай-ақ Ақсу қаласының №4 жалпы орта білім беру мектебінің оқушысы Суфьянов Роман пневматикалық винтовкадан ату бойынша жеке біріншілікте ІІІ орынға ие болды. Ол мергендік шеберлігі мен атыс дайындығының жоғары деңгейін көрсетіп, барлық қатысушылар арасында үздіктер қатарынан көрінді.

Жарыс қорытындысы бойынша Павлодар облысының құрамасы Қазақстан Республикасының 20 өңірлік командасы арасында жалпыкомандалық есепте IV орынға ие болды. Бұл – команданың жоғары дайындық деңгейін және қатысушылардың табандылығы мен бірлігін айқындайтын лайықты нәтиже.

Команданы жарысқа Ақсу қаласындағы Қара металлургия колледжінің алғашқы әскери және технологиялық даярлық пәнінің оқытушысы Жангелдинов Самат Олегұлы дайындады. Оның кәсіби біліктілігі, оқу-жаттығу жұмыстарын сапалы ұйымдастыруы және қатысушыларды жан-жақты дайындауының нәтижесінде команда халықаралық деңгейдегі жарыста сәтті өнер көрсетіп, Павлодар облысының абыройын жоғары деңгейде қорғады.

«Айбын» XII Халықаралық әскери-патриоттық жастар жиынына қатысу Павлодар облысының жас өкілдері үшін әскери-қолданбалы дағдыларын жетілдіруге, патриоттық тәрбиені нығайтуға, көшбасшылық қасиеттерін, тәртіптілігі мен командалық өзара іс-қимыл мәдениетін дамытуға зор мүмкіндік болды. Қол жеткізілген нәтижелер өңір жастарының жоғары әлеуетін, олардың табандылығы мен Отанға деген сүйіспеншілігін айқын көрсетіп, болашақтағы жаңа жетістіктерге берік негіз қалайды.