Тіл – халықтың қазынасы

Тіл – әр халықтың ғасырлар бойы қалыптасқан асыл мұрасы. Ол ұлттың тарихын, мәдениетін, салт-дәстүрін және рухани құндылықтарын ұрпақтан ұрпаққа жеткізеді. Сондықтан ана тілімізді құрметтеу – әр адамның азаматтық парызы. Қазақстан – көпұлтты мемлекет.

Елімізде түрлі ұлт өкілдері бір шаңырақ астында тату-тәтті өмір сүріп келеді. Әр халықтың өз ана тілі, мәдениеті мен дәстүрі бар. Осындай түрлі тілдердің өзара құрметі мен достығы еліміздің бірлігін нығайта түседі. Қазақ тілі – Қазақстан Республикасының мемлекеттік тілі. Ана тілімізді білу, оны дұрыс қолдану және дамыту – баршамызға ортақ міндет. Тілді құрметтеу тек оны сөйлеумен шектелмейді.

Кітап оқу, көркем әдебиетпен танысу, сауатты жазу және қазақ тіліндегі мәдени іс-шараларға қатысу арқылы да тілімізге деген сүйіспеншілігімізді көрсете аламыз. Тілдер мерекесі – халықтарды бірлікке, достыққа және өзара сыйластыққа шақыратын ерекше күн. Бұл мереке арқылы біз әр тілдің өзіндік ерекшелігін танып, басқа халықтардың мәдениетіне құрметпен қарауды үйренеміз.

«Тіл – халықтың жаны» деген сөз бекер айтылмаған. Тілі бар халықтың тарихы мен болашағы бар. Сондықтан туған тілімізді қадірлеп, оның мәртебесін биік ұстау – біздің қолымызда. Тіл – достықтың дәнекері, бірліктің тірегі, ұлттың рухани байлығы. Тілімізді құрметтейік, тілдерді үйренейік және ана тілімізді ардақтайық! Қыркүйек айының бесіндегі – Қазақстан халқы тілдер күніне орай біздің ағарту ошағының кітапханасында қазақ тілі бірлестігі тарапынан арнайы дөңгелек стол үйымдастырдық.

 Баян УМАРОВА,
№156 жалпы білім беретін мектептің кітапхана меңгерушісі,

Алтын КАСАЙНОВА,
қазақ тілі мен әдебиеті пәні бірлестігінің жетекшісі, Алматы қаласы, Алатау ауданы, Өжет ықшам ауданы