Павлодарлық скрипкашы Регина Джамбазова ТМД елдерінің Дельфий ойындарында жүлдеге ие болды!

Павлодарлық жас таланттар 5–9 қазан күндері Тәжікстан астанасы Душанбеде өткен ТМД елдерінің XX Жастар Дельфий ойындарында Қазақстанның намысын абыроймен қорғады.

Қазақстан құрамасы жоғары шеберлік деңгейін көрсетіп, 4 алтын, 3 күміс және 4 қола медаль — барлығы 11 медаль жеңіп алды. Жарыс қорытындысы бойынша қазақстандық команда бейресми командалық есепте үздік үштіктің қатарына енді.

Бұл жетістіктердің ішінде жерлесіміз, «Скрипка» номинациясы бойынша 14–17 жас санатында өнер көрсеткен Регина Джамбазованың жетістігі ерекше назар аударуға лайық. Жас скрипкашы ТМД елдерінің XX Жастар Дельфий ойындарының дипломанты атанып, қазылар алқасының арнайы жүлдесіне ие болды!

Бұл жетістіктің артында талант, еңбекқорлық, табандылық және музыка өнеріне деген шексіз сүйіспеншілік жатыр. Осындай жоғары деңгейдегі халықаралық сахнада өнер көрсету — жас орындаушының шығармашылық жолындағы маңызды белес. Бұл — өзінің орындаушылық шеберлігін танытып, мол тәжірибе жинақтауға және ТМД елдерінің дарынды жас музыканттары арасында өз қабілетін көрсетуге берілген үлкен мүмкіндік.

Осы орайда Регинаның шығармашылық әлеуетін ашуға, орындаушылық шеберлігін дамытуға және жаңа кәсіби белестерге сеніммен қадам басуына ықпал етіп жүрген ұстазы Касьян Я.О.-ға ерекше алғыс білдіреміз. Регинаның жетістігі — бірлескен еңбектің, музыка өнеріне деген адалдықтың және үнемі жетілуге ұмтылыстың нәтижесі.

Біз дарынды скрипкашымызды мақтан тұтамыз! Регинаға сарқылмас шабыт, жарқын өнер көрсетілімдерін, жаңа жеңістер мен әлемнің ең беделді музыкалық сахналарын бағындыруды тілейміз!

Регина Джамбазова — Павлодар өңірінің мақтанышы, арманына нық қадам басып келе жатқан жас музыканттарға үлгі!