ИДЕЯДАН ДАЙЫН ПРОТОТИПКЕ ДЕЙІН: ТОРАЙҒЫРОВ УНИВЕРСИТЕТІНДЕ «AI&ARDUINO HACK 2026» ХАКАТОНЫ АЯҚТАЛДЫ
Торайғыров университетінде Қазақстанның бес жоғары оқу орнынан келген 32 студенттің басын қосқан «AI&Arduino Hack 2026» республикалық хакатоны өз мәресіне жетті. Екі күн бойы қатысушылар жасанды интеллект, компьютерлік көру және робототехника технологияларын пайдалана отырып, ақылды құрылғылар жасауға күш салды.
Хакатон 3–4 қараша күндері өтті. Алғашқы күні командаларға тапсырмалар мен қажетті құрал-жабдықтар беріліп, олар бірден жобаларын әзірлеуге кірісті. Қатысушылардың міндеті – нысандарды танып, сыртқы құрылғылармен өзара әрекеттесе алатын интеллектуалды жүйелердің прототиптерін жасау болды. Ол үшін студенттер Arduino микроконтроллерлерін, түрлі датчиктер мен атқарушы құрылғыларды, сондай-ақ Python, OpenCV және MediaPipe сияқты бағдарламалық құралдарды пайдаланды.
Іс-шара Қазақстандағы Цифрландыру және жасанды интеллект жылы аясында ұйымдастырылып, Digital Qazaqstan және AI-Sana бастамаларының негізгі бағыттарымен үндесті. Аталған бастамалар цифрлық дағдыларды дамытуға, жасанды интеллект технологияларын кеңінен қолдануға және цифрлық экономикаға қажетті мамандарды даярлауға бағытталған.
Екінші күні командалар жобаларымен жұмысты жалғастырып, тапсырмаларды аяқтады және дайын шешімдерін сарапшылар алқасына ұсынды. Қорытынды кезеңде он команда өз жобаларын таныстырып, олардың ерекшеліктері мен мүмкіндіктерін қорғады. Қазылар алқасының бағалау нәтижесі бойынша хакатон жеңімпаздары анықталды.
Хакатонның өтуіне Halyk Bank қолдау көрсетті. Банк іс-шараның демеушісі ретінде жүлде қорына қаржы бөліп, оның жалпы көлемі 700 мың теңгені құрады. Жүлделі орындар үздік жобалар ұсынған командаларға берілді.
Хакатон жеңімпаздары:
— I орын — Ғұмарбек Дәукеев атындағы Алматы энергетика және байланыс университеті (АЭжБУ);
— II орын — ALT University және Инновациялық Еуразия университеті (ИнЕУ);
— III орын — Торайғыров университеті (ToU) және Л.Н. Гумилев атындағы Еуразия ұлттық университеті (ЕҰУ).
«AI&Arduino Hack 2026» студенттердің білім мен тәжірибе алмасуына, инженерлік және IT саласындағы дағдыларын іс жүзінде қолдануына, сондай-ақ жаңа технологиялық шешімдер әзірлеуіне мүмкіндік берді. Қатысушылар өз идеяларын тәжірибе жүзінде сынап, командалық жұмыс дағдыларын жетілдіріп, жобаларын сарапшылар алдында таныстыру тәжірибесіне ие болды.
