TOU-ДА МӘШҺҮР ЖҮСІП МҰРАСЫНА АРНАЛҒАН ХАЛЫҚАРАЛЫҚ ҒЫЛЫМИ ОҚУЛАР ӨТТІ
Торайғыров университетінде Мәшһүр Жүсіп оқулары өтті. Халықаралық ғылыми-тәжірибелік іс-шараға Қазақстан мен шет мемлекеттердің ғалымдары, зерттеушілері және ғылыми қауымдастық өкілдері қатысты. Биылғы оқулар көрнекті ғалым-филолог, әдебиеттанушы, мәшһүртану ғылымының негізін қалаушылардың бірі Қуандық Пазылұлы Жүсіптің туғанына 85 жыл толуына арналды.
ToU ғылыми алаңында Мәшһүр Жүсіптің рухани және шығармашылық мұрасы, филология, тарих, философия және гуманитарлық ғылымдардың өзекті мәселелері талқыланды. Қатысушылар зерттеу нәтижелерін ұсынып, қазақ ойшылының мұрасын зерделеудегі заманауи ғылыми тәсілдер мен халықаралық ынтымақтастықтың перспективаларын ортаға салды.
Оқуларға ұсынылған 145 баяндама ғылыми іс-шараға деген жоғары қызығушылықты көрсетті. Жұмыс үш секция бойынша ұйымдастырылды: «Мәшһүр Жүсіп мұрасы және қазіргі филологияның өзекті мәселелері», «Гуманитарлық және әлеуметтік ғылымдардың дамуы: дәстүрлер мен инновациялар» және «Қ. П. Жүсіптің ғылыми-педагогикалық мұрасы». Пленарлық отырысқа Қазақстан мен шетелдердің жетекші ғылыми және білім беру ұйымдарының өкілдері қатысты.
Бас баяндамашылар қатарында Құрылтай депутаты, ҚР ҰҒА академигі, филология ғылымдарының докторы, профессор Дихан Қамзабекұлы; Торайғыров университетінің «Мәшһүртану» ғылыми-практикалық орталығының аға ғылыми қызметкері, филология ғылымдарының докторы, профессор Айтмұхамет Трушев; Түркиядағы Ахи Эвран университетінің профессоры Осман Қабадайы болды.
Сонымен қатар оқуларға Ш. Уәлиханов атындағы Көкшетау университеті, Л.Н. Гумилев атындағы Еуразия ұлттық университеті және Түркиядағы Ататүрік университетінің өкілдері қатысты. Шетелдік ғалымдар ғылыми жиынға онлайн форматта қосылды.
ToU-да халықаралық ғылыми оқулардың өткізілуі мәшһүртану ғылыми бағытын дамытуға, академиялық байланыстарды нығайтуға және қазақ халқының рухани мұрасын сақтауға ықпал етеді. Сонымен қатар бұл іс-шара университеттің ғылыми диалогты дамытудағы және гуманитарлық ғылымдар саласындағы зерттеулерді қолдаудағы маңызды рөлін айқындайды.
